Lærdómsrit Bókmenntafélagsins hafa komið út síðan 1970. Í lok árs 2008 voru útgefin Lærdómsrit orðin 72 að tölu og sífellt bætast fleiri við. Allmörg rit hafa komið út í tveimur útgáfum og nokkur í þremur eða fleiri.

Einstaka rit hafa verið uppseld um nokkurt skeið, en verið endurprentuð. Þetta ber merki um miklar vinsældir bókaflokksins og að ritin í honum svari brýnni þörf fyrir vönduð lærdómsrit á íslenskri tungu.

Upphafsmaður útgáfu Lærdómsritanna var Þorsteinn Gylfason sem var ritstjóri frá upphafi til 1997. Ásamt honum sinnti Þorsteinn Hilmarsson ritstjórn þeirra frá árinu 1985 og var ritstjóri bókaflokksins ásamt Þorsteini Gylfasyni frá 1989 til 1997. Vilhjálmur Árnason var ritstjóri Lærdómsritanna frá 1997 en nú er Ólafur Páll Jónsson ritstjóri ásamt Birni Þorsteinssyni.
Efni Lærdómsrita Bókmenntafélagsins verður best lýst með því að rifja upp það sem fram kemur í stuttri kynningu Þorsteins Gylfasonar á þeim í Skírni árið 1969, ári áður en fyrstu ritin litu dagsins ljós. Lýsing hans á bókaflokknum er á þá leið að hann skyldu fylla lærdómsrit en ekki fagurbókmenntir, auðlesin upplýstum almenningi. Þar skyldu jöfnum höndum vera samtímarit og sígild verk sem hlotið hafa skýlaust lof, ennfremur tímamótarit í sögu mannlegrar hugsunar. Sérhvert Lærdómsrit skyldi þýtt á íslensku úr frumtexta af sérfróðum manni á því sviði sem fjallað er um og þýðingin yfirlesin og lagfærð eftir þörfum af öðrum hæfum mönnum. Alla tíð hefur verið reynt að halda í heiðri þessar ströngu reglur um val bóka til útgáfu og vinnubrögð við frágang þeirra. Um hið síðara er það að segja að oft hefur myndast vinnuhópur þýðanda, inngangshöfundar, ritstjóra og fleiri sem lagst hefur á eitt um að gera viðkomandi rit sem best úr garði.

Hið sérstæða og einkennandi útlit og brot Lærdómsritanna hannaði listamaðurinn og bókahönnuðurinn Hafsteinn Guðmundsson, fyrrum prentsmiðjustjóri og útgefandi.

Enn er unnið að útgáfu nýrra Lærdómsrita og er það von Bókmenntafélagsins að lesendur taki þeim fegins hendi hér eftir sem hingað til.