Skírnir - Tímarit Hins íslenzka bókmenntafélags er eitt helsta viðfangsefni félagsins. Ritið hóf göngu sína 1827 og birtir einkum ritgerðir á sviði bókmennta, sagnfræði, heimspeki, stjórnmála, sögulegrar náttúrufræði, lista og þjóðlegs fróðleiks auk ítarlegra ritgerða um bækur. Þótt vönduð fræðirit handa almenningi eigi nokkuð í vök að verjast í þeirri miklu fjölmiðlabyltingu sem nú gengur yfir, er ljóst að Skírnir gegnir mjög mikilvægu hlutverki í samtímanum. Þar eru birtar ritgerðir sem taka málefni til ítarlegri umfjöllunar en unnt er að gera í sjónvarpi, útvarpi og dagblöðum. Skírnir er tvímælalaust þekktasta og virtasta tímarit Íslendinga, og fá eru þau tímarit sem oftar er vitnað til.

Rístu nú, Skírnir, og Skekkils blakki
hleyptu til Fróns með fréttir,
af mönnum og mentum
segðu mætum höldum,
og bið þá að virða vel.

Skírnir hefur iðulega birt vandaðar og nýstárlegar ritgerðir sem vekja lesendur til umhugsunar um menningu og málefni líðandi stundar.

Halldór Guðmundsson er ritstjóri Skírnis.